RECIT de la Tromperie

Ie suis la Deesse du tems Fille de l'ombre, & du mensonge, Dont le plus commun passe temps Soit que ie veille, ou que ie songe, D'une subtille main qui n'a point de seconde Est de tromper icy les plus sages du monde. Ces finets à double humeurs Par la reigle que ie leur donne Reçoivent de moy les faveurs De iamais n'espargner personne, Et d'un habile main, qui na point de seconde, Je faicts tant qu'icy bas ils trompent tout le monde. Belles ne craignez pourtant pas De ces déguisez la malice, Ils redoutent plus vos appas Que vous n'apprehendez leurs vice; Mais unissez vos traits à leur ruse feconde Et vous pourrez gaigner les plus trompeurs du monde.

pour le Crocheteur

Belles secourez moy de grace, Ie sans mon fardeau si pesant Qu'il s'en ira bien tost panchant Si vous n'approchez de ma place: Venez ie vous iure la foy Que vous porterez mieux que moy.

pour un Gladiateur

Combatre c'est tout mon bon heur, C'est là que la gloire m'appelle, Et crois que c'est manquer d'honneur De vivre trois iours sans querelle: Ie voys d'un oeil content mes plus fiers ennemis Me demander la grace à ma valeur soubmis, Ou mourir abbattus d'une playe profonde: Pourtant quelque douceur que i'y puisse gouster, Ie sçay que le plaisir de mettre un homme au monde Est plus grand que celuy qu'on a de l'en oster.

pour l'Empirique

Ie promets guarit de tous maux, Et ne fis iamais une cure, Mais si long temps mon credit dure Il faut des remedes nouveaux: I'en sçay un tres grand, quand il entre, C'est de saigner au bas du ventre.

pour l'Aveugle, aux Dames

Pauvre Aveugle trompé par un fin Charlatan Belles, apres avoir cette niche soufferte Ie vous demande un lieu pour y pleurer ma perte, C'est le seul reconfort que de vous ie pretan: Ne m'y conduisez point de grace, I'iray bien tout seul à taton, Je me contente de la place Où me guidera mon baston.

pour la Bossu

Si i'ay le pourpoint contrefaict Ce n'est qu'un defaut de nature, Tout le bas est assez bien faict, Et m'en reste à bonne mesure: Belles ne vous desgoustez pas Si ce Bossu dance des pas. Vous sçavez que quand il vous voit Son corps tellement se manie, Que de penchant il devient droit, Et pourroit servir Uranie: Mais il ne l'auroit si tost faict, Que son corps seroit contrefaict.

pour le Paralitique, aux Dames

Beautez que vos effects sont doux ! Le grand Dieu de la Medecine N'est point habile au prix de vous, Et ne se congnoit en racine: Tout maintenant i'estois sans pous, Et sans mouvement, & sans mine, Mais soudain vous m'avez recous D'une façon plus que divine: Mes membres de mal oppressez Se sont aussi tost redressez Qu'ils ont senty vostre air propice: Beautez, quels Dieux pleins de vertu Peuvent ainsi pour leur service Redresser un membre abbatu ?

pour le Fol, aux Dames

Vous voyez bien à son visage, A ses yeux, à son entretien, Et à son fantasque maintien, Qu'un pareil à luy n'est pas sage. Belles prenez bien garde à vous, Il est fascheux quand il est doux.

pour la Boemiesne, aux Dames

Si vous voulez que ie devine De vos secrets cachez quelles sont les pensees, Ie cognois bien a vostre mine Que de faire cela vous n'estes point lassees ?

pour la Nourrice

Je ne suis point de ces Nourrices Qui craignant ne l'estre assez tost Presient leur gage, & le depost Emplit bien souvent leurs matrices.

la Laictiere, aux Dames

Mes Dames qui aymez le doux Ce pot au laict n'est pas pour vous, I'en porte un autre sous ma cotte Dont le laict touche plus au coeur, Ce ne sera pas la plus sotte, Qui en goustera la liqueur.

pour l'Enfant

Belles voicy cet Innocent Qui pend encor à la mamelle, Celle qui aymera l'Enfant, Le mette coucher aupres d'elle: Car il n'y peut estre long-temps, Qu'elle n'y prenne passe-temps.

pour le Boulanger

Ie suis un parfaict Boulanger Venez à moy belles chalandes, Le pain blanc que ie fais manger, Est destrempé de laict d'Amandes: Ie iouë quand le four est chaud De l'esquevillon comme il faut, Et pour un seul cas l'on m'adiourne Qui n'est grand quoy que bien cognu, C'est qu'entre ces pains que i'enfourne J'en fais tousiours quelqu'un cornu.

pour le Procureur

Bien qu'on me tienne pour un Asne, Ie suis sçavant en la chicane, Et n'est pas iusqu'à mes valetz, Qui ne soustiennent teste nuë, Que i'esbransle tout le Palais Aussitost que ie me remuë. Cet art qui n'est point mecanique Donne à celuy qui le practique Mille delices à la fois; Mais quoy que l'on en puisse dire La plus grande que i'y reçois, C'est quans on m'oblige à produire.

pour les Paysans

Si d'un pas qui n'est limité Nous observons peu la mesure, C'est nostre amour de la nature Qui se porte à l'extremité: Aussi les causes de nos flames Pressent si puissamment nos ames Par les excez de leur beautez, Qu'il n'est point en nostre puissance D'avoir la libre jouyssance Du corps, ny de nos volontez.

pour les Deux Fripons

Nous sommes valets volontaires De qui le soing diligent Ne demande point d'argent Pour nos salaires ordinaires, Quand à couvert nous servons Le subjet que nous suivons: Belles, c'est un tres bon ménage De nous arrester à vous, Car en vous servant de nous Vous aurez deux valets sans gage; Qui donnent fort librement, Ce qu'on desire en aymant.

pour l'Espagnol

Je prend volontiers à crédit Toutes les hardes qu'on m'apporte; Mais ie traite d'une autre sorte Celles qui prestent dans le lit.

pour le Ioüalier

Ie fais credit à un chacun, Belles avez vous besoin d'avence ? Si vous ne payez c'est tout un Ne craignez pas la violence; Car ie veux traicter avec vous Par un appoinctement plus dous.

pour le Tailleur

Prendre bien iuste la mesure, Tailler, & coudre proprement, Puis rabbatre bien la cousture, Chacun le faict communément: Mais c'est un miracle sans doute D'enfiler dés le premier coup L'aiguille quand on ne voit goute Et cela ie le fais sur tout.

pour le Pipeur

Les hommes sont le but de mes fines cautelles, Mais ie n'abuse point les femmes sur ma foy, S'en voit il une icy qui se plaigne de moy Quoy que ie sois souvent en affaire avec elles ?

pour les Pipez

Voyez, que du ieu la chaleur Nous a reduit à ce malheur De paroistre nuds en chemise, Belles, nous sommes trop honteux, Par pitié cachez nous tous eux Où personne ne nous avise.

pour le Vinaygrier

Vou de qui la teste est si bonne Goustez mon Vin-aigre piquant, Car ie ne sçache point personne Qui en ait de plus excellant: Enfermez-le dans vos bouteilles, Sans doubte il y fera merveilles.

pour la grosse Servante

Belles, i'enten bien le menage, Servez vous de moy seulement, Si ie ne balie souvent, Ce n'est pas faute de courage, Car ne travaillant qu'un petit Ie demeure en mon appetit.

pour le Chanteur de Chansons sur le pont neuf

Si quelque belle moins farouche Veut permettre que sa sa couche Ie deslie mes callessons, Iamais en aucune entreprise Cupidon ne me favorise Si ie la paye de chansons.

pour le couppeur de Bourse, aux Dames

Ie sçay d'une subtille main Soudain que les proches ie fonde Si bien mesnager mon dessein Que ie couppe la bourse au monde: Belles ne craignez pourtant point Que les effects de ma malice Vous attaquent iusqu'à ce point, I'en ay deux a vostre service.

pour le crieur de sablon d'Estampe

Comme sur les bords du Pactole Le sable en or se va changeant, Du mien ie ferois de l'argent Au bruict de ma seulle parole, Mais, par ce qu'une avare fain Ne me faict pas aymer le gain, Je me plais qu'à l'honneur me fortune responde, Et ie le porte seullement Pour monstrer, que ie puis en qualité d'Amant Ietter de la poussiere aux yeux de tout le mon.

RECIT de Mercure, & des Trompeurs

Ie suis ce demon qu'autres fois On nommoit le Dieu d'artifice, Mais ore il faut changer de voix, Et nommer ainsi la iustice: Car Themis avecque sa loy Trompe mieux encore que moy. Les humains se voyans dupez Ont recours à ceste Deesse, Mais quoy ? c'est pour estre pipez D'une plus subtile finesse: Car Themis avecque sa loy Trompe mieux encore que moy.

pour le Commissaire

Quand le galand fait le mauvais, Et qu'il porte ses armes droictes Belles, soudain ie vous le mets Dans vos prisons les plus estroittes, Mais ie fais cela neantmoins, Comme l'ordonnance le porte, Sous la foy de deux bons tesmoins Que ie fais tenir à la porte.

pour un Sergent à pied, aux Dames

Voyez un Sergent croté Faulte d'estre bien monté, Secourez son indigence, Mes Dames remontez moy, Et ie promets sur la foy D'exploiter en diligence.

pour un Sergent à cheval

Je suis Sergent à cheval Qui fait mainte chevauchee, La plume dont i'escris, est souvant empeschee Mais pour faire tousiours plus de bien que de mal: Belles si ie vous adiourne, Comparoissez promptement, Si vous faictes autrement, Et que chez vous ie retourne: L'Amour qui se sert de nous Levera defaut sur vous.

pour le troisiesme Sergent

Ie ne cours point de grands hazars, Et si les plus cheris de Mars Ne me disputeront la gloire, En un iour ie faicts plus d'exploits Que Cesar n'en fit en six mois Avecque ma seule escritoire; Je faits prisonnier par le Roy, Mais i'ay trouvé plus fin que moy, Et sens ma liberté ravie, Car un Archer plus diligent A coffré le pauvre Sergent Dedans la prison de Silvie.

pour le Solliciteur, aux Dames

Mes Dames servez vous de moy, Ie sollicite en bonne foy, Et i'ay de tres bonnes adresses, Mais pour vous servir une fois Si ie ne vois toutes vos pieces Ie ne puis poursuivre vos droits.