Aux Apprentifs Salut Le Balet ayant esté representé par plusieurs Autheurs accordables, qui ensemblement auroient deliberé à la conference des Poettes Philosophes & Musisciens recreatifs, qui cognoissent les Dames d'honneur, à la disposition & alegresse, contemplatives aux quatre perfections de l'homme qui sont , Beau, Riche, Saint & Ieune, dequoy en essence ils auroient par une boutique fourny une Blancque de beautez & richesses admirables, au contentemens des Sains vivans & regnans, qui aderent aux cinq vouloirs de leurs Majestez, ou ce diction leur fut representé pour la Blancque.   Ie viens du pays d'Allemagne, De Saxen & außi des Grisons, Ou i'ay veu des marchands d'Espagne Qui apportent des draps à foisons Pour fournir une belle Blancque Où ils m'ont dict que rien ne manque et que ce doit estre à Paris A l'Houstau du Sire Louis. Et que l'on a des benefices Pourveu qu'on face sacrifices A la Deesse, ou demy-Dieu Qui est habitant en ce lieu. Allons nous y en tous ensemble Ce sera bien faict ce me semble Allons donc compere Colas. Vien-ça cousin Simon le Gras, Dy moy de quelle marchandie, Dy le moy tost, quoy qu'on en die I'ay les plus beaux verre iolis Qu'on sçauroit trouver à Paris: Et moy la meilleure eau de vie Que tu ais iamais beu en ta vie. Voicy nostre Vallet de feste Qui vient icy faire la beste, Pourveu que l'argent ne nous mancque Il nous faut tirer à la Blancque. Laquelle Blancque fut posée dedans le Louvre en triomphe, & publiée au bon-soir & au bon sejour, le Dimanches vingt-deuxiesme de Ianvier. LE COMMISSAIRE fut le premier representé par Monsieur le Duc de Croüis, declara icelle affaire en façon de ceremonie, & rapportant tout ordre pour empescher qu'il n'y arivast quelque tumulte, & representa son authorisation par escrit aux Dames, ainsi qu'il est contenu. Ie suis icy pour le procés verbal, c'est moy qui tient les registres du Bal, Si d'aventure il s'y fait insolence, Soudain par moy la iustice s'advance, Ce ieu permis i'establis en ce lieu: Or vous sçavez qu'Amour est un grand Dieu, Qui sur les coeurs à puissance infinie, Ie croy de vous que pas un ne le nie, Devant vos yeux i'ateste son pouvoir, Que nul icy ne mancque à son devoir, On ne sçait pas les secrets de nature, Ny du bazard la douteuse avanture, Si bien ou mal vous arrive pourtant Revevez-le d'un courage constant, Ie viens expres pour establir l'affaire, De par le Roy, ie suis bon Commissaire, Et si d'huille de reins i'aßigne, Pour supporter en paix mon signe, A Dieu ie me retire sans d'autre rire. LE PLAISANT fut representé par monsieur Gerin, vestu à la goguette, contre-faisant le Boetteux miserable, qui incita la compagnie à la resjoüissance de tous bons accords, où il fut veu par l'assemblée, & presenta son billet aux Dames. Vous autres qui prenez plaisir A danser vos bouffonneries, Vous devez tous avoir desir De voir mes tours de singerie: Il se faut donner du bon temps, Quand ce n'est pas à ses despens. LE SOLDAT fut representé par Monsieur le Comte de S. Agnen, arrivant avec sa gravité, fourny d'armes pour monstrer l'exercice de l'arc militaire, offrant son service en toute obeissance, caressant les Dames qui estoient proches de la Blancque & leur presenta son service. Voicy le compagnon de Mars Qui cherche par tout les hazars, Et ne fait estat de fortune Non plus que des flots de Neptune. Rien ne le peut endommager, Il vient icy comme estranger, Pour s'advancer en ceste blanque, Sans crainte que l'argent luy manque. C'est un soldat avantureux De qui l'aime est amoureux, Et le masque n'a l'advantage De pouvoir cacher son courage. Il ne fait pas tant le mignard, Et tient bonne espée & poignard, Quelque benefice qu'il tire, Il le donne, & fust-ce un Empire. S'il pouvoit trouver du bon-heur, Autant qu'il s'est acquis d'honneurs De vous servir il se propose, Et mesprise tout autre chose. L'ESCLAVE fut representé par Monsieur de la Ferté Fervaques, qui par son habilité & forteresse avoit navigué & prins la nourriture sur la haute mer, mere du support des mors, Mores, Normans, François & Bourguignons, lequel s'acosta des Dames qui devoient assister aux trois ballets preparez, l'un au Louvre, l'autre chez Monsieur Scarron, & l'autre dedans l'Arsenat, où il leur presenta son chant Royal, soubs la surseance des gens de guerre, qui rouloient les balles des canons & boulets des mousquets. Ie ne crains plus les fameuses chansons, Ny les magiques leçons Que sont ces vieilles Sorcieres: Car la haute mer à conduit mon retour En ce lieu, ou ce trouve des lumieres, Qu'admireront le Ciel de mon beau sciour. Guerroyans plains d'honneur n'auront effroy, Pour rendre service au couronné Roy Soubs sa faveur & des ombres Qui fuisse au decord en divers lieux, Pour reparer les parolles sombres Tenues au beau seiour de par les Dieux: Qui r'allient & remettent les esprits, Aux esclaves à quelque apris, D'avoir veu l'eclair sortir du tonnerre, Qui console la terre par les gens de guerre, I'irans en paix avec les Dames, S'approchant du Purgatoire où sont les feux, Qui sortent des beaux yeux des fames, Ne brulans rien n'est si digne qu'eux. L'EMOUIEUX fut representé par Monsieur le Comte d'Auvergne, qui par la Noblesse crie gaigne petit, pour inciter à faire accommoder les armes de cuisine, servans aux affineurs bouchers & gens de guerre, qui auroient licensé & separé le caresme envoyé en champagne, & prenant au perche sur la frontiere des Normans, qui sont l'an accordé par le hola des Dames, fait à l'adieu des gens d'armes, & presenta son chant royal. Pour moy ie suis gaigne petit, De servir i'ay bon appetit, En bien faisant rien ne m'estonne, Si quelqu'une veut voir comment, Qu'elle s'approche seulement: Car ie n'en refuse à personne. Mon ouvroir fort bien preparé, A nul autre n'est comparé, Ie sçay comme l'on s'accommode, Pour les Dames i'ay des outils Qui ne sont point trop inutils A chacune selon sa mode. En fon de mon gentil sçavoir, Mes Dames s'il vous plaist de voir La prompte & bonne diligence, Il ne faut que vous avancer, Ie suis tout prest de commencer, Vous en aurez l'experience. LE PAYSANT fut representé par Monsieur le Duc de Rais, faisant trafic en Laboureur, qui contemploit les richesses d'icelle Blancque, pensant par estimation evaluer les pieces & estoffes, ç cause que la Paysant participe au grand iugement, qui presenta ces airs aux Dames. IE suis un peu rude paisant, Ie n'ay pas la perruque blonde, Le taint frais, le regard plaisant: Mais ie suis assez suffisant Pour rendre une terre feconde, Ie n'ay pas l'air d'un amoureux, Ne mesme la peau delicate, Du travail ie suis desireux, I'ay le bras fort & vigoureux, Et nest motte que ie n'esclatte. Si le terroir est par trop gras, Apres la premiere baichée, Ie reprend, pour faire mon cas, Auparavant que ie sois las, Ma besoche bien emmenchee. Pour moy ie ne m'espargne point, Quelque terre que ce puisse estre, Ie quitte chausse & pourpoint, Et travaille si bien à point Qu'à la fin ie m'en rends le maistre. Aux terroirs les plus frequentez Il y a moins de peine à prendre, Si tant soit peu vous les tastez, Incontinent vous desgoutez: Car ce n'est rien que de la cendre. [4 vers illisibles] LE IARDINER fut representé par monsieur de Ricieux, où il presenta aux Dames de belles fleurs, differentes de couleurs, & bouquets d'herbes de senteurs. Poussé en ceste rreur commune, Qui fait adorer la fortune, Pour l'heur qu'elle tient dans ces mains, Ie viens tirer à ceste Blancque, Soubs sa faveur qui souvent manque, A l'esperance des humains. Ie viens d'un coeur plain d'innocence, Esprouvez (si par sa puissance) I'auray les biens qu'elle depart: Et si sa faveur fortuite, Fera qu'en defaut du merite, Ie les acquiere par hazard. Belles Dames dont les merveilles, N'ont point au monde leurs pareilles, Ces fleurs que ie vous ay presentez Font voir icy plusieurs beautez Et si ie tire icy un benefice, Ie vous en feray Sacrifice. LE CHARLATAN fut representé par Monsieur de Sainct Luc, ayant une boeste pleine de drogues d'Apotiquaire, avec des senteurs, qu'il presentoit aux Dames, avec son memorial. De mon estat ie me reconforte, Plusieurs vivent de mesme sorte, A qui sera le meilleur tour: Trompe qui peut c'est la devise, Chacun s'accommode à sa guise, Außi bien au ieu qu'en amour. Soubs l'esclat d'une belle iuppe, Ie ne passe guere pour duppe, Mais ie faicts trotter le poulet, Ie baise les mains, ie regarde, Mon Page souvent ie hazarde, Qui sçait bien iouer son rolet. En fin i'ay bonne fortune, Qu'il en tombe tousiours quelqu'une, Et i'entends si bien leurs façons: Que sans donner Carquant ny chesne, Et sans trop les mettre à la gesne, I'en suis quitte pour des chansons. L'INDIEN fut representé par Monsieur le Marquis de Rosny qui avoit des miroirs ardens, où il representoit à toute l'assemblée & la Blancque, le tout plus grand qu'il n'estoient. Donc les representa au iugement des Dames, avec son air & chant Royal. Vous que l'honneur a contrainct à sa taire, (Et souffrir sans parler) Ie voy icy des Singes pour vous complaire Et pour vous consoler: Afin qu'au moyen d'un songe gratieux, Puisse contenter les desirs de celle qu'aimez mieux. L'ESCROQUEUR fut representé par Monsieur de Criqui, qui taschoit à couriser les Dames, leur presentant son dicton. D'Escroqueur ie faicts l'exercice, Toutesfois sans grand artifice, Ny me peiner aucunement: Si ie trouve une chappe cheute, C'est là dessus que i'execute Mon petit faict gaillardement. Ie ne voudrois prendre la peine De tracasser en tire laine, Comme la pluspart des mattois: Iamais bon-heur ie ne refuse, N'importe pas si l'on s'abuse, A me voir faire le courtois. S'il vous plaist d'en nommer un autre, Qui plus que moy soit du tout vostre, Ne qui les Dames serve mieux: Qui le dise, & l'ose entreprendre, Ie veux este reduit en cendre, Par le doux feu de vos beaux yeux. LE FOL fut representé par monsieur le Conte de la Voute, avec des Cymballes & Sonnettes, salüant l'assemblée de ioyeuses folies en son chant Royal. Que sert tant d'armes à porter, Pour faire le peuple espouventer Au bruit des cloches d'Armes: Qui ne cessent de tabouriner Donnant de fauces allarmes, Ie veux me rendre du Clergé, Pour recueillir sans semer, Et vivre bien à mon aize: I'airay à la chasse monté, Et veoir ma commere l'Abbesse, Car l'Abbé ie chanteray, En bon langage qu'exposeray Pour estudier la game, Car apres avoir bien repensé Bé my, aré ve, ne vaut pas gé. L'ASNE fut representé par monsieur Marets un autre incogneu qui emeurent le combat pour avoir la preference de Prescheur ou Practicien à la ioyeuse assemblée. Ces deux Chevaliers incogneuz, (Dont la valeur incomparable) A tant de combats soustenus, Qu'au monde leur gloire ost notable: Ont fait voeu solemnellement De bien servir parfaitement. On ne les voit point desguiser, Masquez en cent formes nouvelles, Pour trop finement abuser La simplicité des plus belles: Les charmes dont ils sont armez, C'est de servir pour estre aymer. L'honneur, la constance & la foy, La courtoisie & la franchise, En tout temps ont donné la loy A leur genereuse entreprise, [illisible] que c'est liberté D'estre captifs d'une beauté. Le combat qui fut fait par un fol qui avoit des armes, & un sage qui tenoit un ballet, dequoy des verges en fait les ballets aux soldats, fut epousté, le second ballet le vint degager & separer, apportant balles, billes, rondeaux pour tirer quelque benefice ou prieuré à la blanque. Le Serviteur fut representé par Monsieur du Vivier, qui cria de l'eau de vie. Ie suis armé de toutes pieces Et si i'ay de forts bons seconds, Iamais ie n'ay manqué d'adresse Pour bien fonder quoy qu'on en die Ie vous fourniray d'eau de vie. LE SERGEANT fut representé par Monsieur Cecilien qui faisoit des contraintes aux Dames en singerie. Si ie porte un habit de singe Sans braquette ny flageollet, Ce n'est pas que dessous mon linge Il n'y ait un bon pistollet, Qui tire trois coups sans amorce Tout par Amour sans qu'on le force. LE COURTISANT fut representé par monsieur Amulot qui carressoit les gens de bonne façon, pensant accoster quelque benefice fourcheu, à condition soubs son apparence qui presenta aux Dames. Mon pere estoit d'un noble parantage, Ses armes estoient ainsi que mon bonnet, Il m'a laissé pour tout bien en partage Quatre bouteilles, & un grand gobelet. LE MAQUEREAU fut representé par monsieur Samant, qui de la science d'autruy en fait marchandise en la Court. On me cognoist pour homme entier Franchement ie faicts le mestier Petit & bon cest mon attente Ie besongne tant que ie puis, Au gain trop aspre ie ne suis, D'honnesteté ie me contente. La Putain fut representée par Monsieur Morel, estant effronté, voulant iuger des instrumens de nature, qui incita la dance du premier Balet allant à la Blancque, tira par cabriolles des billets de hazard. Le Sot fut representé par monsieur du Port qui faisoit de l'ignorant avec les reverence d'entendement, qui s'informoit s'il estoit de nature ou de bacarre, se presentant aux Dames. Le Verrier fut representé par monsieur de Parade, à crier verre iolis & belles fiolles. Le Valet de la feste fut representé par monsieur Pinçon qui portoit des billets pour la Blancque. L'Assistant fut representé par monsieur de Curcy & Malandré, suivans à danser au Balet, puis allerent tirer à la Blancque. Le Page fut representé par monsieur Payenne qui emporta le prix de la disposition. L'Armafrodite fut representé par monsieur de Mont-Aigu, qui paroissoit tenir des deux natures, voltigeant tousiours en l'air. Le Herpignot fut representé par monsieur Augustin qui paya le monde de vent & de comptes pour aller à la Blancque. La fiebvre au pousse se taste, Le levain corrompt la paste, Ie vous ayme unicquement Si me serviez fidellement. Qui veut en trop de lieux pretendre, Ne prend rien en pensant tout prendre. On devine bien sans le dire, De quel mal vostre coeur souspire. Le bon homme est un peu trop vieux, Choisissez une autre fois mieux. On vous a donné des allarmes, Qui vous font ietter maintes larmes. Bien que vous viviez enfermée, De plus d'un vous estes aymée. Vous ne pouvez rien enflammer, Pour estre aymée il faut aimer. Ne craignez les ans inconstans, La vertu n'est subjette au temps. La deliberation d'iceux Ballets a esté conferée au grand College qu'avoit fait preparé le feu regretté Henry le Grand qui se plaisoit à instruire ces guerriers escoliers en la recreation mondaine qui est le reveil au iugement de la resurrection, comme chacun c'est representé à son estat devant la notable assistance aspective à la reduction pacifique, aisni qu'il leur a esté remonstré par icelle poüesie & Philosophie soubs l'authorité & permission de leurs Majestez qui accorderent le congé à iceux danseurs, disposez ioüeurs, à qui honorablement leur fut par les Dames presenté des doux baisers par accollations, & confitures, consummez au departement du premier Ballet joué dedans le Louvre. Le Second Ballet fut commencé à trois heures du matin à l'Hostel de Monsieur Scarron. Le Troisiesme Ballet fut ioué dedans l'Arcenal tout de mesme.