Comme tout le monde cherche à l'envi les moyens qu'il est possible de trouver, pour feliciter & honorer l'illustre Reyne de France, le plus beaux & adroits Bergers de ce Royaume, ioints avec leurs Compagnes & maistresses, n'ont pas esté des derniers à luy rendre leurs devoirs. Ils s'assemblerent donc ces iours derniers, & firent compositions ensemble de l'aller complimenter, & luy donner, comme aussi à toute la Cour, une heure de recreation, par un Bal qu'ils danserent avec toute la naisveté qui fuit ordinairement telle sorte de personnes champestres: Et pour ce faire, ils firent une feinte Royauté, laquelle iointe au suiet, reüssit si bien, qu'il en receurent l'applaudissement & la satisfaction qu'ils meritoient. Et comme plusieurs personnes en ont entendu faire le recit, ceux qui furent presens ont bien voulu le mettre en lumiere, pour contenter les curieux.

Le Grand Bal du Soleil

Vers pour Morphes Dieu des songes

Qu'elle merveilleuse adventure, Les songes hostes de la nuict, Fuioient la lumiere & le bruit: Et contre l'ordre de nature, Au lieu du Palais du sommeil, Ils trouvent celuy du Soleil. Portez sur l'aisle du silence Ils venoient troubles les esprits, A qui de iour Mars ou Cypris Font ressentir leurs violences; Et vouloient mesmes , O grand Roy ! Dans ton Palais semer l'effroy. Mais par tes vertus heroïques Tous soupçons sont ensevelis, Et l'Empire des Fleurs de Lys Est exempt de terreurs paniques; Permets donc à leur bon desir, De te donner quelque plaisir.

Vers pour l'Estoille Matutinalle

Portez en Occident vostre clarté funeste, Fuiez, tristes flambeaux, & quittez le seiour De la voute celeste, Où s'allume le iour. Faites finir vos feux, qui s'en font trop à croire, Le basoin des mortels delivrez du sommeil, Et son Throsne de gloire Fait venir le Soleil. I'ay tort, l'Astre du iour que ie soulois conduire, Se cache, sçachant bien avec quelles clartez Amour va faire luire Le Soleil des beautez. Voicy que d'un bel oeil la splendeur coustumiere, Sur l'Orison François va de ses doux regards Adoucir la lumiere, Qu'espand l'Astre de Mars.

Vers pour la balle Iris

Humains mettez fin à vos larmes, Calmez vos coeurs remplis de larmes, Le Ciel rit à vos desirs, Et l'air gracieux vous promet mille plaisirs. Amour garny d'arc & de flammes Revient blesser les belles ames: Et tous vos maux intestins, Se vont convertir en Tournois, Bals & Festins.

Dialogue de Planettes & des Musiciens

Planettes: D'où vient que l'Astre du iour Nous refuse sa lumiere ? Musiciens: Le Ciel n'est plus le seiour De sa clarté coustumiere. Planettes: Pourquoy l'a-t'il delaissé ? Musiciens: Pour l'amour d'une beauté. Planettes: Quel cher regard au Soleil Peut l'embrazer de ses flammes ? Musiciens: C'est un rayon nompareil, Qui vient du Soleil des ames. Planettes: Pourquoy ne lui-til aux Cieux ? Musiciens: Il brûleroit tous les Dieux.

Vers pour la belle Elizene, Bergere representant l'Amour

Ma divine splendeur, que tout le monde implore, Des ombres de la nuict dissipe l'appareil: Parmy tant de clarté ie ne suis que l'Aurore, Mais dedans peu de temps ie deviendray Soleil.

Quatrain pour Elysabeth, representant une des heures

En vain amour & la victoire Vont où se portent mes regards, Il me suffit d'avoir la gloire De posseder un ieune Mars.

pour la petite Hersilée, representant aussi une des heures

Mortels, à qui mes yeux sont plus chers que le iour, Il vous faut resioüir, agreables cohortes ? Aux Dieux les plus puissans du Ciel i'ouvre la porte; Mais celle de mon coeur ie la ferme à l'amour.

Quatrain pour l'agreable Thoinon, autre Bergere representant außi une des heures

L'heure des humains glorieux de me voir, Comme il me plaist s'avance, ou se retarde: Qui me pourroit esgaler en pouvoir, Puis que le Ciel est commis en ma garde.

pour la belle Philene autre Bergere, representant außi une des heures, SIXAIN

Mortels contemplez sans dessein Ce beau visage, & ce beau sein, Merveille du siecle où nous sommes, Que sert leur printemps à vos yeux, Les Roses en sont pour les Dieux, Et les espines pour les hommes.

La belle Catherine Bais-Dor Bergere precede celle qui doibt representer le Soleil, le monstrant au doigt, recite ces vers

Ce bel Astre esclatant d'un si rare merite, Vient luire parmy nous en superbe appareil: Comment se fait cela ? la terre est trop petite Pour loger le Soleil ? Il a dedans le Ciel une route certaine, Dont s'estend la splendeur des feux que nous voyons, Et ne repose point qu'en la region hautaine, D'où coulent ses rayons. L'à porté dans un char brillant d'or & d'ivoire, Il rend de sa clarté tous les yeux esbloüis: C'est le coeur de LOUIS.

Stances pour l'illustre Esther agreable Bergere, representant le Soleil, parlant au beau Berger Sivol

Aux rives que le Tage dore Ie semois de fleurs mes habits, Un matin, que la belle Aurore Ouvroit les portes de Rubis: Tournant les yeux vers l'Hemisphere, I'apperceus les heures du iour, Qui dans l'Empire de mon pere Font leurs courses ordinaires, & l'esclairent tousiours. Dée qu'elle me virent paroistre, Et les graces à mon costé: C'est, dirent elles, nostre Maistre, Voila son front, ses yeux, sa suitte & sa clarté. Le rapport des traits du visage, Qu'alors elles trouvoient en nons [nous] Leur faisoit tenir ce langage, Et s'adresser à moy, pensant parler à vous. Ie rougis tant d'aise & de honte, Que mes yeux & mon teint vermeil, Pour favoriser ce mesconte, Me faisoient ressembler l'Aurore & le Soleil. Sortez vous maintenant de l'onde ? Disoient elles en s'approchans, Allosn donner le iour au monde, Depuis vostre lever, iusqu'à vostre couchant, Mais nous sommes bien estonnées De vous voir icy ce matin, Ne sçachant qu'elle destinée Vous fait vous esloigner du pays Levantin. Tandis que les heures s'arrestent Aux demandes qu'elles me font, Ie monte au char qu'elles m'apprestent, Et mets incontinent vostre couronne au front. Allons commencer nostre course, Leurs disie alors en souriant, Où la lumiere prend sa source, Quand elle fait venir le iour de l'Orient. Soudain ie pris cette brisée, Et l'Aube riante en ses pleurs, Versoit l'agreable rosée, Semant devant mes pas les Perles & les fleurs. D'aise & de gloire trnasportée Ie changeay bien-tost de dessein, Voyant Pyrene & Galathée, Qui pour faire la Paix se descouvroient le sein. Ces Nimphes leurs courroux appaisent Qui devoient troubler les humains; Et par deux fois elles se baisent, Et se touchant le coeur, aussi-bien que les mains. Ma filie, se me dit Pyrene, En quel lieu te promene tu: Au temps que tu doibs estre Reyne D'un Royaume & d'un Roy digne de ta vertu. Le destin, qui iamais ne change Les effets d'un Arrest fatal, Attache d'un Royal eschange A l'Empire des Lys, l'Empire Occidental. Va t'en l'agreable esperance Du fameux Throsne des Gaulois Va reluire au ciel de la France, Pour donner à chacun ta lumiere & tes loix. Pyrene parla de la sorte, Et Galathee en sousriant, Me donna les Lys que ie porte, Et m'apprit que la France estoit mon Orient. Lors ie pars sous la loy commune, Que quitte mon natal seiour, Pour venir au port de la Lune, Trouver un beau Soleil qui me donne le iour. En quelque part que ie chemine, Dans cet agreable printemps, Devant vostre oeil qui m'illumine, Les miens font & refont, grand Roy, tousiours content. Comme i'ay fait mesmes offices, Que vous faites en esclairant, I'ay receu mesmes sacrifices De ceux qui vont par tout vostre Sceptre adorans. Enfin i'acheve ma carriere devant vous, mon Soleil vainqueur ? Pour recevoir vostre lumiere, Qui m'esclaire les yeux, & me brusle le coeur. C'est de vous que ie prends ma flamme, En quelque lieu que nous soyons: Vous estes l'Astre de mon ame, Et seulement ie fuis l'objet de vos rayons. Ces heures de vos rays esprises M'assurent qu'en suivant mes pas, Elles ne se sont point mesprises, Et qui me prend pour vous, ne se mesconte pas. Si l'humeur, l'âge & la naissance, La face & la condition, Nous donnent quelque ressemblance, I'en trouve beaucoup plus par mon affection. Le pouvoir d'un amour extreme, Qui m'a sousmise à vostre loy, Me change si bien en vous-mesmes, Que ie ne suis que vous, & cesse d'estre moy.

Elle mesme se tournant vers une ancienne Bergere, mere du Berger Sivol, prononce ces vers avec un air fort agreable

Ie viens en presence de tous, Non pour vous donner la lumiere; Mais pour la recevoir de vous, Beauté des beautez la premiere, Soleil des coeurs, Astre puissant, A qui tout est obeyssant. Devant vos yeux, source d'amour, Comme Maistresse de la danse, Ie conduits les heures du iour, De qui ie marque la cadance, Pour venir vous recevoir, La conduitte de mon Soleil. Ie vous presente un fein Soleil, Mais vostre lumiere feconde En a produit un sans pareil, Digne d'esclairer tout le monde, Dont toute la posterité Reconnoistra la verité.

Le Lecteur est adverty que la pluspart de ses vers ont esté premierement composez en Espagnol, puis traduits en François pour contenter les curieux, qui en ont fait recherche.