Aux Dames Si vous desirez de sçavoir, Qui nous meut de vous venir voir (Beaux subiectz de nostre venue:) Vous portez un aymant si doux, Qu'il dresse nos plumes vers vous, Par une puissance incognue. Nous quittons les saincts Innocens, Et la praticque des passans, Pour cercher meilleurs fortune: Nous venons la plume à la main, Emprunter vostre parchemin, Et vous offrir bource commune. Nos plumes fermes par le bout Que nous faisons marquer par tout, Laissent de si bons caracteres: Que quand elles sont en leur point, Les femmes ne se lassent point, D'employer de tels Secretaires. Essayez ce contentement, Pour demy- heure seulement, Vous en voudrez faire coustume: Apres ie vous puis asseurer, Que si nostre encre peut durer, Nous fournirons tousiours de plume.