Bien que la poußiere & la crace, Qui paroissent sur nostre face, Nous facent iuger paisans: Néantmoins tout tant que nous sommes Estans dans le coeur gentils-hommes, Ne cedons point aux courtisans. Nous n'avons pas tant de dorures, De clinquans & de chamarures, D'autant que nous les mesprisons: On void par ces habits champestres, Nous nous ont laissé nos ancestres, L'antiquité de nos maisons. Que si nos grecques despecées, Et nos moustaches abaissées, Nous font porter un peu bas: Nous monstrons bien quand il faut ioindre, Nostre courage n'estre moindre, A toutes sortes de combats. Pour picquer, pour rompre une lance, Pour lesioustes ou pour la dance, Nous nous trouvons en tous endroictz: Et demeurons en telle estime, Que nous faisons perdre l'escrime Aux plus braves & plus adroicts. Dames, nos lances enroüillées, Dans un sang genereux mouillées, Font plustost vivre que mourir: Voire à quiconque les essaye, Font une si plaisante playe Qu'on n'en voudroit iamais guarir.