accueil

|

contact

|

contributions

|

liens

Airs de Cour	|	ballets	|	cantates	|	madrigaux
oeuvres diverses	|	opéras	|	oratorios	|	pastorales
	|	sérénades	|	recherches	|

Ballet des Esclaves

dancé à Chartres

 

 

aux Dames Recit musical avec Machines

Vive Source d'Amour d'où naissent les plaisirs Qui ravissent nos ames, Belles qui nuit & iour allumés de desirs, Qui consomment nos coeurs par des soupirs de flammes, Appaisez vos rigueurs, car c'est à vos beautés Que vous devés le prix de nos captivités. La fortune & l'Amour disputent devant vous, Avecque la Nature, Mais ces deux de l'amour apprehendent les coups, Et reverent en vous sa vivante peinture, Car vos yeux sont si doux, qu'il doit à ces vainqueurs, L'aymable auctorité qu'il a dessus les coeurs. Tout ce qu'on dit d'Amour ne sçauroit nous charmer, O ! beautés sans pareilles, Il n'y a rien en luy qui puisse faire aymer, Mais vous nous decouvrez chaque iour des merveilles, Et jamais ne sera admis au rang des Dieux, S'il ne regne en vos coeurs comme dedans vos yeux.

 

 

Premiére Entrée   pour un Demon des Esclaves   aux Dames Malgré les hommes & les Dieux, Il n'y a rien dessous les Cieux Qui ne redoûte ma puissance, Ie tiens esclaves sous mes loix Les Grands, les Princes & les Roys, Außi-tost qu'ils ont pris naissance.     Seconde Entrée   pour deux Lacquets & une Servante   aux Dames Si nous ne pouvons aspirer, A vous cherir & adorer, Comme trop vile creature, Estant nés pour estre subjets, Nous travaillons sans interests, Comme le vault nostre nature.   Troisiesme Entrée   pour un Avaritieux & un Prodigue   aux Dames Les naturelles paßions Nous tiennent en subjections, Comme ces hommes en machines; En vain nous ne voulons forcer, Puisque l'on ne peut arrester Le cours de l'Astre qui domine.   Quatriesme Entrée   pour un Fol & une Folle   aux Dames De se railler de Fols, c'est chose fort commune, La Folie est un mal dont chacun se ressent, Mais si dedans ma teste on voit regner la Lune, C'est pour faire porter aux autres le Croissant.   Cinquiesme Entrée   pour l'Amour   aux Dames Sans que jamais vous m'ayés veu, Sans que jamais vous l'ayés sçeu, Vos rares beautez m'ont fait naistre: Belles apprenez qui ie suis, Si vous me voulez bien cognoistre, Vous pourez beaucoup plus scachant ce que ie puis.   Sixiesme Entrée   pour un Berger amoureux d'une Reyne dont il est aymé   aux Dames Que nostre sort est doux, que nos ames contentes, Respirent de parfaits plaisirs, Nos feux sont innocens, nos flames sons constantes, Ainsi que sont tous nos desirs; Mon baston pastoral à charmé ma Princesse, Tout Berger que ie fus i'en ay fait ma maistresse, Cet insigne bonheur rend tous les Dieux jaloux, Elle ayme ce baston plus que le diadesme, Il finit sa langueur, & la mienne demesme, Mais ce n'est pas celuy dont ie chasse les loups. autre pour le mesme Quoy bien que differens de rang & de noblesse, Amour ne laisse pas de nous bien ajuster, Car s'il fait abaisser cette belle princesse Ce petit insolent me fait souvent monter.   Septiesme Entrée   pour trois Gallants   aux Dames Quoy demeurer tousiours confus, Sans cesse souffrir des refus, Ou seroit donc nostre refuge; Belles l'amour demeure en vous: Vous ne pouvez le recuser pour Iuge, Si vous le voulez bien, nous le voulons bien tous.   Huictiesme Entrée   pour un Vieillard donnant Serenades à sa Dame   aux Dames Ie fais honte à ces Ieunes gens, Qui croiroyent en estre malades, L'hyver à la pluye & aux vens, Quand ie donne des serenades, Belles sans respecter mon aage, Esprouvez moy dans l'esclavage Ce visage emprunté fera nostre advanture, Si vous daignez gouster le divertissement, Que vous promet un autre & plus doux instrument, Il y va seullement de me dire vostre heure.   Neufiesme Entrée   pour la Fortune   aux Dames Ie suis cette Déesse qui reduit un Royaume En petite cité, Et qui faits des Palais une maison de chaume Plaine d'aversité, Mais aujourd'huy pour vos beaux yeux, Ie veux que tout rie en ces lieux.   Dixiesme Entrée   pour deux Iardiniers   aux Dames Nous foüillons en tous lieux il n'est aucune plante, Dont nous ne découvrons les secretz importans, Nous faisons l'écusson & nous entons en fente, Selon que le requiert la façon ou le temps, Nos arrosoirs tous plains font germer toutes choses, Ils forment dans l'esté les oeillets & les roses, Mais ce n'est pas pourtant par ces petits conduits, Que nous rafraichissons l'ardeur de la nature, C'est avec la vertu d'une liqueur plus pure, Qui fait cesser les fleurs, & fait porter des fruicts.   Unziesme Entrée   pour deux Poetes   aux Dames Nous sommes des Chantres d'amour, Belles, qui veillons nuict & iour, Pour vostre honneur & vostre gloire, Sans nous on ne cognoistroit pas Ce qu'on peu vos charmans apas, Car nous vous mettons dans l'histoire.   Douziesme Entrée   pour trois Braves   aux Dames Dans les combats guerriers nous sommes genereux, Nous en sortons chargez de palme & de victoire. Mais il faut advoüer qu'aux duels amoureux, Vous ne manqués iamais d'en r'emporter la gloire.   Treiziesme Entrée   pour quatre Matelots   aux Dames Sans le secours de la boussole, Qui dans la navigation, Par une rare affection Enseigne aux Matelots le Pole Sans vouloir cognoistre le Nort, Nous avirons sans nulle peine, Avec nature qui les meine Ne manqueront jamais le Port.

 

 

pour le Grand Balllet

 

pour huict Esclaves

aux Dames Dans l'aymable prison de l'Empire amoureux, On n'a jamais cogneu d'Esclaves plus heureux, Que ceux que vous voyez parestre, Ils n'ont d'autres plaisirs que de vous divertir, Puisque vos yeux les ont faict naistre, Faictes les y entrer plustost que d'en sortir.

Haut de page