Ballet_Delivrance_Chevaliers

Si tost que la grande toile qui couvroit le frontispice du Theatre fut abbatuë ont vit aux deux costez d'iceluy une forest de Palmiers si artistement representée que les yeux des spectateurs en furent surpris & douterent long temps si elle estoit effective, la Palestine n'en vit iamais une si verdoyante & bien qu'elle n'eust que trois toises de longueur, elle paroissoit toutesfois en avoir plus de mille, tant la perspective y estoit poinctuellement observee. Au fonds dudit Theatre parut une maison de plaisance assortie de toutes les beautez qui peuvent faire admirer un grand ouvrage, les tours qui l'embellissoient, les fontaines qui l'environnoient & les allees de Iasmin qui paroissoient à ses costez, donnoient des ravissemens extraordinaires, le tout esclairé avec une grande quantité de lumieres, desquelles on ne voyoit neantmoins que l'effect, qu'il sembloit que ce fust le propre sejour du Soleil: Dans ceste forest parurent douze Paladins François, qui lassez du travail de la Mer prenoient leurs divertissemens à voir dancer.
Six Matelots armez de Ramez argentees, qui faisant la premiere entree tesmoignoient par la gaillardise de leurs pas autant d'agilité sur terre qu'ils avoient heu d'adresse sur Mer pour conduire ces fameux Heros dans ceste Isle, mais dans la plus ardente chaleur de leur dance, apres une longue tempeste de tonnerres & d'esclairs, une nuë parut au Ciel s'y espaisse que toute la Scene en fust obscurcie & eux saisis d'effroy, constraints de chercher leur asseurance dans le forest des Palmiers.
Ceste nuë descendant du Ciel & grocissant peu à peu, couvrit tout les fonds du Theatre; comme elle fut à une toise prez du parterre, elle s'ouvrit: Zirphee parut assise au milieu, tenant un l'hut à la main, environnee d'une infinité de lumieres qui la faisoient briller toute en or. Les nuees roülloient continuellement autour d'elle, & par la melodie de sa voix ayant endormy les Heros, elle descendit à terre portee sur une petitenüe qui se destacha del a grande. Et dans la seconde entree fit voir ses pas aussi miraculeux que ses actions, d'un coup de baguette & tous brisez par une prompte tempeste qui s'esleva, on ne vit que montaignes couvertes de glaçons & de neiges & ce ne fut plus qu'un desert effroyable à la veuë.
Deux Demons descendus de l'air & deux sortans du centre de la terre, donnans la troisiesme entree, par le commandement de leur Maistresse firent paroistre au milieu de la Scene le Dieu de l'Hyver sur un throsne de neiges, de glaces & de frimats. Morphee Dieu du sommeil couché à ses pieds ronflant sur des gerbes de pavots, soubs lequel y avoit trois grottes, de l'une desquelles sortit:
Aeole Roy des vents qui faisant la quatriseme entree avec des agilitez merveilleuses excita des effroyables tempestes.
Boree & Aquilon aussi animez que leur Roy, dans la cinquiesme entree soufflerent avec tant de violence que les Rochers en furent ébranlez.
Apollon descendant de la Montaigne de l'Hyver, vint donner la sixiesme entree, enveloppé d'une nuë qui la couvroit à demy & par ses rayons languissans & la melancholie de ses pas tesmoigna le desplaisir qu'il avoit de quitter par la force des enchantemens ce delicieux sejour.
Morphee s'estant esveillé au son des violons, pour faire la septiesme entree, le someil le pressant continuellement, ne luy donna pas le moyen de la faire longue, il le contraignit aussi-tost de s'aller mettre dans son repos ordinaire.
Deux femmes couvertes depuis la teste iusques aux pieds d'une crespe noir semé d'estoilles d'argent, qui representoient les longues nuits, ayans fait la huictiesme entree, s'allerent insensiblement coucher pres de Morphee, leur ancien favory, aux pieds de l'Hyver.
Le Marquis de Fiestan Ambassadeur des Scites avec ses pas aussi extravagants que ses habits, fit la neufiesme entree.
Le Palatin de Surdermanie Admiral de la Mer glaciale, fit la dixiesme entrée, les ravissemens des spectateurs furent extraordianaires, voyans le capricieux assortiment du personnage.
Le Duc de Kalembert extraordinairement deputé par les Gellons ayant fait la unziesme entree, suivy de ses deux Pages, aussi fantasquement habillez que luy, fut avec les deux autres remercier la belle Zirphee de ce qu'elle avoit retiré l'Hyver de leurs contrees pour en enrichir ceste Isle.
Zirphee avec ses souplesses accoustumees dans un contentement n'ompareil de voir ses volontez executees avec tant de promptitude & si poinctuellement pour tirer plus de satisfaction de son entreprinse, changea tous ces Paladins en des monstres du tout espouventables, leur assigna à chascun un lieu pour garder ceste Isle infortunee & empescher par leurs effroyables rencontres 'abored à toute sorte de personnes.
Dans un instant la Scene s'estant changee, on ne vit plus qu'une Mer entouree de Rochers, de Ports, de Phares, & de montaignes inaccessibles, la Renommée descendant de la plus eminente, portant deux trompettes, en bouche vint annoncer au grand Alcandre Gaulois que le Ciel avoit destiné la deslivrance de ces Heros à sa seule valeur & ayant faict par son recit la treiziesme entree l'asseura que toute sorte de bon-heur l'accompagneroit en ceste entreprise.
Tandis que les spectateurs admiroient avec estonnement l'atificiel adjancement de ceste Mer & qu'ils s'entretenoient à voir quantité de vaisseaux, qui dans l'esloignement paroissoient courir avec une vitesse incomparable, Opis & Driope (Nayades de la Seine). Dans la quatorziesme entree vindrent porter à Thetis Deesse de la Mer, le commandant d'Alcandre qui estoit de luy preparer un équipage digne de sa grandeur pour courir sur les Ondes & voler au secours de ses fidelles serviteurs.
Une voix melodieuse peu à peu s'approchant le long des Costes de la Mer fit voir que c'estoit la Deesse de la Force, qui preparoit la quinziesme entree. Elle estoit montee sur un chariot tout d'or enrichy d'une infinité de Coquilles d'Argent, de Corals & de Bouqueterie, traisné par deux grands Lyons Marins pour servir d'escorte en ce voyage au glorieux Alcandre, deux Tritons la suivoient portans sur leur dos les Genies de la Iustice & de la Clemence, charmans par la delicatesse de leur voix cet invincible Conquerant, lequel parust bien-tost apres monté sur un superbe Daufin, qui portant cet aggreable fardeau avec une tranquilité extraordinaire le rendit en peu de temps au port desiré.
Au bruit d'un son confus de Trompetes, de Clairons, de Hautbois & de Conques Marines, fait par un nombre infini de Tritons & de Nereides, esclatant avec une merveilleuse harmonie, la Mer disparut & la Scene fut veuë dans sa premiere froideur.
Alcandre seul armé d'un bouclier & d'une espee entra dans l'Isle. ce fut à ceste seiziesme entree que les Monstres gardiens apres un opiniastre combat furent défaits, mis en fuite & Zirphee aux genoux de ce Triomphateur adorant sa valeur, fut veuë implorer sa misericorde, renoncer à ses Demons & dans un instant par la vertu de sa verge enchantee la Scene remise dans sa premiere beauté. Les Paladins en la mesme posture qu'ils avoient esté endormis dans la Forest des Palmiers receurent au milieu d'eux leur Liberateur sur un lict de Roses & de Lys & avec de nouvelles admirations adorerent sa chere veuë.
Zirphee ravie en des contentements extresmes pour arrester le grand Alcandre plus long temps dans ceste Isle & iouyr de sa chere presence apres une musique de l'Hutsn de Thyorbes & des voix parfaictement concertées luy offrit tous les divertissemens possibles & fit sortir,
Le Dieu de la Chasse & le Dieu de la Pesche qui promirent à ce Prince toute sorte de plaisirs & ayans fait la dixseptiesme entree.
Le Dieu du Ieu & de la Musique ne furent pas moins empressez. Dans la dixhuictiesme entree à divertir ce Heros qu'ils avoient de contentement à l'admirer.
La dixneufiesme entree se fit par une grande Guenuche (ordinaire recreation du Palais de la belle Zirphee) vestuë en Dame de Village, de laquelle quatre Nains estoient amoureux, leurs pas bouffons, & leurs grimasses reiterées, furent capables de resioüir la plus noire melancholie.
Zirphee pour faire voir à ce Prince glorieux, que si dans ce sejour il desiroit estre servi par des Dames, ou par des Gentils-hommes, elle avoit dequoy le satisfaire. Fit donner la vingtiesme entrée par des Hermafrodites, à leur abord les sages de Grece eussent heu de la peyne à contenir leurs ris.
Et pour luy donner des plus grandes preuves de sa puissance merveilleuse, apres les entretiens qu'il receut en effet, elle luy en voulut fournir une idee & par ses enchantemens luy fit voir un des plus aggreables divertissemens que l'imagination puisse concevoir, ce fust la iouste qui se fait en Avignon sur la belle Riviere du Rhosne, son Pont incomparable, ceste Roche escarpee qui luy sert de deffense, la multitude des peuples, des Carosses, & des Cavaliers, qui assiterent à ceste Feste, y furent si heureusement representez, que la verité n'a iamais eu des charmes si ravissans, que la figure en fust esmerveillable.
Enfin apres mille autres divertissemens foit de la veuë soit de l'ouye, Alcandre resolu à son despart suivi de douze Paladins lassez de ceste oisiveté finirent par un Grand Ballet dancé avec une merveilleuse iustesse & quittans ceste Isle, s'en allerent jouyr du repos qui leur avoit esté acquis par les incomparables labeurs de cet invincible Monarque.