Premier Recit de Bacchus le Desbauché, Representé par le Sieur Marais Vive la Paix & ses delices, Ie ne cherche point les combats Qu'avec les flacons & saucices Où mon coeur prend tous ses esbats. Ma gloire C'est de boire. Lors que ie dors le mieux Le bon vin me réveille, Et n'ay point d'yeux Que pour voir la bouteille. Ie n'espargne point force escus, Pour faire baiser à des couppes Ces damoiselles de Bacchus Que l'on coiffe avec des estouppes. Ma gloire C'est de boire. Lors que ie dors le mieux Le bon vin me réveille, Et n'ay point d'yeux Que pour voir la bouteille. Admirez ma bonne fortune, Les Nymphes dont ie fay le choix Sont celles qui font sur la brune Leur busc d'une escuelle de bois.Ma gloire C'est de boire. Lors que ie dors le mieux Le bon vin me réveille, Et n'ay point d'yeux Que pour voir la bouteille.

Second Recit de Bacchus le desbauché, accomodé à l'air qui estoit faict Que ce vin nouveau Faict de grands miracles, Ie sens mon cerveau Tout remply d'oracles, Que i'ay de pouvoir, Ie suis en fortune, Le vin me faict voir Deux choses pour une. Ie sens un tison Caché sous ma robbe, Ie perds la raison: Qui me la desrobbe ? Remettons au jeu, Chargeons la nacelle, Pour boire trop peu Le corps me chancelle.

Vers pour le Roy et les Princes et Seigneurs qui ont dansé avec sa Majesté, selon l'ordre qui suit

pour le Roy, representant une Tireur de laine Retournons au mestier, c'est trop repris haleine, Et pourtant, Compagnon, asseure le Bourgeois: S'il arrive iamais que ie tire la laine, Ce sera seulement sur l'espaule des Roys. Courons sans perdre tems l'un & l'autre hemisfere, Et lors face le Ciel resusciter Iason, Quelque vaillant qu'il soit,, il aura fort à faire, S'il peut de mes assauts deffendre la Toisons. Ces Romodons de nuict de Calix & de Douvre Donnent aux foibles gens ou le mal ou l'effroy: Mais de quelque support qu'un grand Orgueil se couvre, Pour le demanteler il faut parler à moy. pour Monsieur le Comte de Soissons, representant un Tireur de laine L'espoir d'un infame butin, Où me veut porter le Destin, N'est point l'aise qui me chatoüille: Mon coeur de gloire revestu Ne butte à rien qu'à la depoüille Des ennemis de Vertu. pour Monsieur le Prince de Lorraine, representant un Coureur de nuict Aux Dames: Par vous, beaux Astres de la Cour, L'Hyver est la saison nouvelle. Dieux ! quels charmes n'a point le iour En France où la nuict est si belle ? pour Monsieur le Grand Prieur, representant un Coureur de nuict Lors que ma paßion me guide Ie vay la nuict plus que le iour, Mais tousiours le secret preside Dans les effets de mon Amour. pour Monsieur Frere du Roy, representant un Donneur de Serenades Ma gloire, ô Celestes Beautez, C'est que la nuict à mes costez J'ay la Deesse Harmonie, Dont la douce tyrannie Faict que ie tire un Soleil D'entre les bras du Sommeil. pour Monsieur le Duc de Longueville, representant un Donneur de Serenades Phyllis, c'est tems perdu, l'Amour qui me conduict Ne te faict pas oüir une Lyre importune: Mais dans l'obscurité des ombres de la nuict Trouveray-ie le iour de ma bonne fortune ? pour Monsieur le Duc d'Elbeuf, representant un Donneur de Serenades Que me sert, ô Cloris, que les sons de ma Lyre Réveillent tes beaux yeux qu'Amour me rend si chers, Puis que ton coeur se rit au sort de mon martyre De voir qu'au lieux de luy i'attire des rochers ? pour Monsieur le Duc de Chevreuse, representant un Amoureux Mortels, à qui l'Amour faict sentir ses espines, Avec estonnement iettez sur moy les yeux: Toute la terre sçait que les Beautez divines Ont pour l'Amour de moy souvent quitté les Cieux. pour Monsieur le Duc de Luxembourg, representant un Amoureux S'il se faisoit, Caliste, un Roy des Amoureux, On me verroit le front paré d'un diadesme: Bien que ta cruauté me rendre malheureux I'ay pourtant plus d'Amour que n'en a l'Amour mesme. pour Monsieur le Mareschal de Crequy, representant un Amoureux Beauté qui me fay souspirer, Peux-tu plus long temps differer De mettre fin à mes desastres ? Parlmy les amants glorieux Ie suis ce que parmy les Astres Le Soleil est dedans les Cieux. pour Monsieur le Mareschal de Bassonpierre, representant un Amoureux Quelques assauts que le Sort Me livre iusqu'à la mort, I'en obtiendray la victoire: Le plus rigoureux tourment Ne me peut oster la gloire D'aymer eternellement. pour Monsieur le Marquis de Courtanvault, representant un Amoureux Amoureux que ie suis, apres tant de langueur Le Sort me promet bien une plus douce vie: Mais que puis-je esperer ? un Monstre de rigueur Garde ce cher trsor dans le sein de Silvie. pour Monsieur le Duc de Montmorancy, representant un Faiseur de Mascarades Apres avoir quitté le casque La paix me faict prendre le masque Que l'Amour m'a faict rechercher. Cloris, ne m'en donne aucun blasme: Ce voile ne peut t'empescher De voir les secrets de mon ame. pour Monsieur de Bleinville, representant un Faiseur de Mascarades Mon sort, desguisé que ie suis, Peint la ioye où sont mes ennuis, Mon oeil rit lors que mon coeur pleure, O cruauté ! puis qu'à toute heure Pour les mysteres de l'Amour Il se faut masquer à la Cour. pour Monsieur de Chalez, representant un Faiseur de Mascarades Si la souplesse des postures Mettoit les Sceptres dans la main, I'esgalerois mes advantures Au Sort de l'Empire Romain. pour Monsieur de Liancourt, representant un Faiseur de Mascarades Ne blasmez point, Esprits volages, L'exercice où ie me suis mis, Bien que ie porte deux visages Ie n'en ay qu'un pour mes amis. pour Monsieur de la Valette, representant un Cavallier desbauché Dans la pompe sont mes plaisirs, La danse anime mes desirs, Le Demon du Ieu me conserve: Il a pouvoir de m'enflamer, Mais un Soleil tient en reserve Le feu qui me doit consumer. pour Monsieur de la Rocheguyon, representant un Bourgeois desbauché Ie n'ay rien dont l'Amour & Bacchus ne dispose, Le jeu faict que ma bourse a le cul renversé: Y cherche un tresor c'est une mesme chose Que de chercher de l'eau dans un pannier persé.

Vers des Sacrificateurs de Bacchus Quittez cette place sacrée Où la Vertu se recré. Loin prophanes, loin d'icy, Le Ciel le veut ainsi. La flame de nos sacrifices Ne luit point où sont les Vices. Loin prophanes, loin d'icy, Le Ciel le veut ainsi. Vers chantez par les Esclaves de Bacchus triomphant Quel Sort, Merveilles de la terre, Nous conduit en ce beau sejour Captifs par fortune de guerre Pour nous rendre esclaves d'Amour ? Refrein de Bacchus, qui sert pour tous les coupplets Loin ces lances & ces escus Acquis par ma dextre aguerrie, Icy les vainqueurs sont vaincus Par les yeux d'ANNE & de MARIE. Les Esclaves En la perte de la victoire La douleur nous a transpotez: Mais nostre honte est nostre gloire Puis que LOUIS nous a domptez. Que la Terre ne s'en travaille, Que le Ciel n'en soit point jaloux: Les Dieux, s'il leur donnoit bataille, Seroient prisonniers comme nous. Il a captivé la Fortune Malgré la rage des Enfers, Et mesmes l'orgueil de Neptune Reçoit ses chaisnes & ses fers. Ce Mars nous a donné la vie En nous ostant la liberté, Qui toutesfois nous est ravie Par la Deesse de Beauté. Vers chantez par Bacchus, estant en la presence des Reynes Grandes Reynes, dont la victoire N'a surmonté que des Cezars, Ce char de triomphe & de gloire Prend son lustre de vos regars. Refrein des Esclaves, qui sert pour tous les coupplets Que les Cieux nous sont favorables, Puis qu'ils nous ont offerts Ces objets adorables Pour adoucir nos fers. Bacchus Aussi ie viens chargé de palmes Porter l'hommage à vos beaux yeux, Qui rendent toutes choses calmes Horsmis le coeur des plus grands Dieux. Vous allez voir un Prince Auguste, Qui mille travaux devorant En Paix se faict voir außi Iuste, Qu'il est en guerre Conquerant.