Recit de la Naiade, portée sur un Dauphin

Ces Ninfes pleines de mespris, Voyant tant de pauvres Espris, Qui bruslent d'une ardeur profane, Quittent leurs antres & leurs bois, Et viennent avec leur Diane Vous donner de meilleurs loix. Les Coeurs qui ne sçavent qu'aymer Apprendront de se reformer Avec de si chastes exemples, Et desormais dedans la Cour On ne trouvera plus de Temples Où l'on sacrifie à l'Amour. Car elles iront détruisant Ce Dieu qui vous va seduisant, Et le faisant brusler encore Au feu de son propre flambeau, De l'Autel mesme où l'on adore Elles en feront son Tombeau. Apres un coup si glorieux Elles s'en iront dans les Cieux Pour commencer une autre guerre, Et ne croy pas que les mortels Les puissent retenir en terre Si ce n'est avec des autels. Außi bien ne voyons-nous pas Qu'elles prisent rien icy bas De toutes les choses mortelles, Les hommes les ayment en vain, Et le fierté d'estre si belles Est cause de tout leur dédain. Car le juste orgueil de se voir Si parfaittes dans leur miroir Endurcit si fort leur courage, Qu'il faut croire que leur Beauté Qui tient vos ames en servage Maintient les leurs en liberté. Et tant s'en faut qu'en vous blessant Elles s'allent esiouissant De ce que leur trait vous surmonte, Qu'au contraire en blasmant leurs coups Leurs beaux yeux semblent avoir honte D'user leurs armes contre vous. Mais rien ne les irrite tant Que de voir qu'on s'alle flattant En sa vaine perseverance, Et qu'un homme puisse esperer Par ses pleurs une recompense Que les Dieux n'osent desirer. Reglez doncq si bien vos soupirs Que mesme en vos plus grands desirs Vostre coeur demeure insensible, Et cessant de vous enflamer, Si c'est quelque chose poßible Adorez-les sans aymer.

Vers masculins pour la Chaisne du mesme Ballet

Nos esprits libres & contents Vivent en ces doux passe-temps, Et par de si chastes plaisirs Bannissent tous les autres desirs, La danse, la chasse, & les bois, Nous rendent exemptes des lois Et des miseres dont l'Amour Afflige les coeurs de la Cour. Et c'est plustost avec cet art Qu'avec la pointe de ce dard Que cette trouppe se deffant Des traits de ce cruel Enfant. Car en changeant tousiours de lieu Nous empeschons si bien ce Dieu, Qu'il ne peut s'asseurer des coups Qu'il pense tirer contre nous. Ainsi nous defendans de luy Et passans nous iours sans ennemy, Nous essayons de luy ravir La gloire de nous asservir. Il est bien vray qu'en nous sauvant, Il nous va tousiours poursuyvant, Et nous poursuit en tant de lieux, Qu'en fin il entre dans nos yeux. Mais encor' qu'on puisse penser Qu'alors il nous doive offencer, Pourtant nous n'avons point de peur Qu'il nous puisse enflamer le coeur. Car la neige de nostre sein Empesche si bien son dessein, Qu'alors qu'il nous pense enflamer Son feu ne se peut allumer.

La Renomée, au Roy

Pleine de langues & de voix, O Roy le miracle des Roys, Je viens de voir toute la terre: Et publier en ses deux bouts Que pour la paix ny pour la guerre Il n'est rien de pareil à vous. Par ce bruit ie vous ay donné Un renom qui n'est terminé Ny de fleuve ny de montagne: Et par luy j'ay fait desirer A la troupe que j'accompagne De vous voir & vous adorer. Ce sont douze rares beautez, Qui de si dignes qualitez Tirent un cueur à leur service: Que leur souhaiter plus d'appas, C'est vouloir avec iniustice Plus que les cieux ne peuvent pas. L'Orient qui de leurs ayeux Sçait les titres ambitieux, Donne à leur sang un advantage Qu'on ne leur peut faire quitter Sans estre yssu du parentage Ou de vous, ou de Jupiter. Tout ce qu'à façonner un cors Nature assemble de tresors Est en elles sans artifice: Et la force de leurs esprits D'où jamais n'aproche le vice Fait encor accroistre leur pris. Elles souffrent bien de l'Amour Par ellesface chaque iour Nouvelles preuves de ses charmes: Mais sitost qu'il les veut toucher, Il reconnoist qu'il n'a point d'armes Qu'elles ne facent reboucher. Loin des vaines impreßions De toutes ces folles paßions La vertu leur apprend à vivre: Et dans la Cour leur fait des lois, Que Diane auroit peine à suivre Au plus grand silence des bois. Une Reyne qui les conduit De tant de merveilles reluit, Que le soleil qui tout surmonte, Quand mesme il est plus flamboyant, S'il estoit sensible à la honte Se cacheroit en la voyant. Aussy le temps a beau courir, Ie la feray tousiours fleurir Au rang des choses eternelles: Et non moins que les immortels, Tant que mon dos aura des elles, Son image aura des autels. Grand Roy faites leur bon accueil: Loüez leur magnanime orgueil, Que vous seul avez fait ployable: Et vous acquerez sagement, Afin de me rendre croyable, La faveur de leur iugement. Jusqu'icy vos faits glorieux Peuvent avoir des envieux: Mais quelles ames si farouches Ozeront douter de ma foy, Quand on verra leurs belles bouches Les raconter avecques moy ?