Airs de Cour | ballets | cantates | divers opéras | oratorios | pastorales | sérénades | recherches | Tables des Airs de Cour |

Denys Macé

Airs, dedicacez à Monseigneur Seguier, Evesque d'Auxerre

Dédicace A l'Illustrissime & Reverendissime Monseigneur Dominique Seguier, Evesque d'Auxerre, Conseiller du Roy en ses Conseils d'Estat & privé, & premier Aumosnier de sa Majesté, Monseigneur Je n'ay pas entrepris de publier icy les Eloges de vos perfections : car vous possedez tant de rares qualitez, qu'il est mal aisé de juger qu'elles sont les plus adorables. Je laisse cette entreprise à ceux qui mieux versez que moy dans les sçiences se trouveront encor bien empeschez, venant à jetter les yeux sur l'esclat de tant de vertus qui vous accompagnent. Mon dessein n'est autre que de supplier vostre grandeur, de voir d'un œil favorable ces Airs, que vos bien-faits ont escols, & que j'estimeray dignement recompensez si vous prenez plaisir à les entendre, & les mettre à couvert soubds l'authorité de vostre nom. Attendant cette faveur de vostre bonté, je m'efforceray de vous faire paroistre chaque jour de ma vie, que je suis, Monseigneur, Vostre tres-humble & tres-obeissant serviteur, D. Macé

Aille qui voudra à la guerre Allons aux champs, belle Silvie C'est ta beauté Sylvie Celuy qui libre se gouverne Celine, tu dois estre lasse Devant Cloris mon courage me laisse Imitons ce tyran des ames J'entretiens ces forêts je conte mon martyre Jusques à quand belle Isménie Les plaisirs des saisons premieres Premiere image de Philis Prends courage Sylvie Puis que dans la captivité Quittez ô Parques vos fusées Rendez vos yeux plus doux Saison de Ris & de l'Amour Eccho qui responds à ma voix

Aille qui voudra à la guerre

Aille qui voudra à la guerre Pour y dresser des bataillons, J'ayme mieux accoster un verre Sous l'estendart des saucissons: Faisant paroistre mon courage Au cher amy, ou a la cage. J'ayme bien mieux suivre la piste De ce grand monarque Bacchus, Que d'estre enrollé dans la liste De ces pauvres enfants perdus, Que l'on n'a jamais veu paroistre Au Miroir ny dans l'Arbalestre. Sus, sus enfans faisons gogaille, Et ne parlons plus de combats, Si nous faisons quelque bataille, Que ce soit contre un Cervelas: Passons toute la nuict à boire, Nous emporterons la victoire.

Allons aux champs, belle Silvie

Allons aux champs, belle Silvie, Le doux Printemps est de retour, Et pour mieux passer nostre vie Ne parlons plus que de l'Amour: C'est là où bien plus librement Nous pourrons vivre en nous aymons Parmy tant de belles préries En despit de ces envieux, Nos amoureux resveries Se pourront lire dans nos yeux: Car nous pourrons plus librement Vivre & mourir en nous aymant. Nous serons exempts de la crainte Qui souvent trouble nos plaisirs, Banissant bien loin la contrainte Que nous gardons dans nos desirs: Allons, afin que librement Nous puissions vivre en nous aymant.

C'est ta beauté Sylvie

C'est ta beauté Sylvie, Qui me donne l'envie D'aymer le trespas Parmy tes appas: Voy donc que mon amour est extresme Puis qu'il faut pour ma mort montrer combien je t'ayme. Je croy que c'est trop vivre: Car ne pouvant te suivre Que ferais-je icy Comblé de soucy ? Quoy ? Veux-tu, cher objét de mon ame, Que pour me soulager je mesprise ta flame?

Celuy qui libre se gouverne

Celuy qui libre se gouverne Par le demon de la taverne, Cherit son sentiment: Tout luy plait, & dedans ce temple Il n'y voit rien que le parfait exemple De tout le divertissement. D'un clin d'oeil on à toutes choses Les moindres fleurs y sont de roses, L'on trouve que tout rid: Sans la soing de faire cuisine, Un esveillé de rubiconde mine De mets contente nostre esprit. Mesme on a veu des destinées Respecter les vieilles années Des yvrongnes parfaits: Ils ne parlent jamais de guerre, Et leurs combats ne s'excitent qu'au verre, Et par le vin ce fait leurs paix.

Celine, tu dois estre lasse

Celine, tu dois estre lasse, Par une si longue disgrace, De tenir mon ame en langueur: Je vay mourir sans resistance, Si tu ne perds de ta rigueur, Ou si je perds de ma constance.   Je tache à rencontrer un crime Qui puisse rendre legitime La cause de mon chastiment: Mais je ne voy rien qui l'offence, Et je trouve en moy seulement Dequoy prouver mon innocence.   Je ne suis point taché du vice D'estre sorti de ton service, Dans ce traictement rigoureux: Si c'est un crime punissable Que d'avoir esté malheureux, Condamnez-moy, je suis coupable.

Devant Cloris mon courage me laisse Le Poëme est de Charles Beys

Devant Cloris mon courage me laisse, Je perds ensemble, & l'haleine, & le poulx. Et mon respect joint avec ma foiblesse, Pour l'adorer me jette à ses genoux. Pasle, & débile je voy ce vainqueur Presque immobile de trop de rigueur, Comme moy de langueur. Je leve un peu mes pesantes paupieres Mais ces regards ne la peuvent toucher, Pour la fleschir, le bruit de mes prieres Est moins qu'un vent pour abbatre un rocher. Pasle, & debile, &c.

Imitons ce tyran des ames Le Poëme est de Charles Beys

Imitons ce tyran des ames, Le vin seul luy fournit des flames Bacchus là sous-mis à ses loix: Il jette ses flesches par terre, Et ne cherche point d'autre verre Pour s'enyvrer que son Carquois. Toute sa bande est en desroutte, Il a tant beu qu'il ne voit goutte Quoy qu'il ayt osté son bandeau: On le voit qui des-ja sommeille, Et qui d'un reste de bouteille Esteint le feu de son flambeau. Je quitte l'amour de Caliste, Le plaisir rend mon ame triste, Je l'abhorre quand je l'ay pris: Mais celuy qu'on reçoit à boire Chassant l'ennuy de la memoire Charme le goust & les esprits. Parfaits amis, joyeuse trouppe, Sans trembler vuidons cette couppe, Excitons la soif en buvant, Et ne nous faschons point contre elle Quand elle seroit eternelle, Si nous pouvons boire souvent.

J'entretiens ces forêts je conte mon martyre Le Poëme est de Charles Beys

J'entretiens ces forêts, je conte mon martire A ce muet rocher, Et devant ma Philis je n'oserois rien dire Qui la puisse toucher. A miles beaux vers je chante qu'elle est belle, Je revere ses loix Et je manque au moment que je m'approche d'elle Et d'esprit, & de voix. Maintenant que je puis, delivré de ma crainte, Invocquer le trespas Approche toy Philis, pour entendre ma plainte, Mais ne me trompe pas.

Jusques à quand belle Isménie

Jusques à quand, belle Isménie Feras-tu voir ta tirannie A un cœur innocent Des peines qu'il ressent ? Dieux ! Puis qu'à ce Printemps la joye est de retour Faittes avec les fleurs renaistre son amour. Quoy que mon mal soit sans exemple, Quand de l'esprit je le contemple, C'est dans mes entretiens Les propos que je tiens. Dieux ! Puis qu'à, &c. Si mon souhait n'est legitime, Son mespris à causé mon crime: Dieux ! Elle m'a quitté Dieux ! Puis qu'à, &c.

Les plaisirs des saisons premieres Le Poëme est de Charles Beys

Les plaisirs des saisons premieres Ne sçauroyent plus me captiver Je ne veux cherir que l'hyver, Puis qu'il fait glacer les rivieres. Eschauffons nos esprits avec ce vin vermeil, Dont la chaleur vaut mieux que celle du Soleil. Que j'ayme à voir le Soleil blesme Quand il ne luit plus qu'à demi: Car il punit nostre ennemi, Et renferme l'eau de l'eau mesme. Eschauffons nos esprits, &c. Bacchus, c'est toy seul que j'admire, Tous tes effets sont nompareils, Tu nous fais voir mile soleils, Pour un Soleil qui se retire. Eschauffons nos esprits, &c.

Premiere image de Philis

Premiere image de Philis Sortez de ma triste pensée, Vostre lumiere est effacée Devant les yeux d'Amarilis: Elle possede mile appas Que les plus parfaittes n'ont pas. Belize, cache ta beauté, La sienne seule est adorable, Et je tiens pour moins favorable Ta douceur, que sa cruauté. Elle possede mile appas, &c.

Prends courage Sylvie Le Poëme est de Charles Beys

Prends courage Sylvie Remets par ta vertu Ton esprit abbattu: Prolonge un peu ma vie, Je souffre tes douleurs, Et mourray si tu meurs. Nous changeons en louanges Nos pleurs & nos soupirs, Reprenons nos plaisirs: S'il est vray que les Anges Sont exempts du trespas Elle ne mourra pas.

Puis que dans la captivité Le Poëme est de Charles Beys

Puis que dans la captivité Hymen a retenu ta vie: Philis rends moy la liberté Que tes yeux m'ont ravie: Car quel plaisir de me voir consommer, Si l'Hymen te defend de m'aymer. N'offre tes appas gracieux Qu'à celuy qui dort en ta couche, Et ne montre plus à mes yeux Ny ton front, ny ta bouche: Car quel plaisir, &c. Non, Philis, tu peux qu'à tort M'oster une si belle chose, Rends tes yeux tesmoins de ma mort, Puis qu'ils en sont la cause, Prends dont plaisir, &c.

Quittez ô Parques vos fusées

Quittez, ô Parques, vos fusées, Cessez ces fatales brisées De mes jours limitez: Tranchez d'un autre les années, Je suis exempt des destinées De vos trois deitez. Cessez, une Parque nouvelle Plus que vous, divine & plus belle, Me regit seulement: Ses yeux, & sa face angelique Vous ont osté cette pratique, Me rendant son amant. Par ses benins regards, mon ame Esprise d'une sainte flame Me rend esgal aux dieux, Et se desrobant de moy-mesme Pour aller en celle que j'ayme.

Rendez vos yeux plus doux Le Poëme est de Charles Beys

Rendez vos yeux plus doux, Sis-je digne de hayne Pour estre absent de vous ? Je souffre assez de peine Quittant vos doux appas, Ne me punissez pas. Cessez de vous fascher, Cloris, vostre justice Devroit se relascher: Mon crime est un supplice Pire que le trespas, Ne me punissez pas.

Saison de Ris & de l'Amour

Saison de Rids, & de l'Amour, Printemps, jeunesse de l'année, Que me sert de voir ton retour Si tu ne puis changer ma fiere destinée ? Chacun respire tes douceurs, Et moy je n'ay que des douleurs. Ce Dieu qui dore l'univers Des rayons de sa tresse blonde, Ennemy des tristes hyvers, Fait naistre avec les fleurs le plaisir dans le monde. Chacun respire, &c. Ce verd, dont l'esmail gracieux Inspire une douce esperance, En vain s'offre devant mes yeux, Si Doris ne veut point alleger ma souffrance. Chacun respire, &c.

Eccho qui responds à ma voix

Eccho qui responds à ma voix, Que faut-il faire à mon martire ? Pourray-je vivre sous ses loix Sans oser me plaindre ou le dire ? Arbres sacrez, & solitude & silence, Je vous prends à tesmoings de ma constance. Pourquoy luy dire mon tourment ? L'on void assez sur mon visage Que mon cœur souffre incessamment: Mais sans espoir qu'on le soulage. Abres sacrez, &c.