accueil

|

contact

|

contributions

|

liens

Airs de Cour	|	ballets	|	cantates	|	madrigaux
oeuvres diverses	|	opéras	|	oratorios	|	pastorales
	|	sérénades	|	recherches	|

 

Anthoyne Boessét

Surintendant de la Musique de la Chambre du Roy, & de la Reyne 

Airs de Cour, avec tablature de Luth

 

 

Table

Airs de Cour

Quelle est cette merveille Puis que ce Dieu vainqueur Ie ne suis plus cette Iunon Ie sers de l'oeil & du penser A la fin cette Bergere Cruel tyran de mes desirs Ne deliberons plus, alons droit à la mort Frescos ayres d'el prado

a

 

A la Reyne

Madame, Les bien-faicts que je reçois tous les jours de vostre Maiesté ont tant d'excez que je ne puis en parler sans deffaut, ny les taire sans ingratitude: & particulierement ce dernier dont il luy a pleu de m'honorer, beaucoup au dela de mon merite & mesme de mon esperance; le ressentiment que j'en ay m'est si sensible, que rien ne me le sera jamais a l'esgal du desir de m'en rendre digne, & de vous tesmoigner par mes tres-humbles services, qui si vostre Maiesté pouvoit faire choix d'une personne qui eust plus de devotion envers elle. les efféts luy en rendront de jour en jour des tesmoignages plus manifestes que les paroles. Ce pendant je la supplie tres-humblement d'avoir agreables ces ouvrages que je luy dedie comme a l'unique deïté à qui tous les beaux esprits de la France doivent ce qu'ils ont de rare. Ie n'ay pas la vanité de pretendre de luy rien devoir en ce titre: mais j'ay bien l'ambition de contribuer avecqu'eux a sa gloire quelque travail non mesprisable, auquel si l'on trouve du deffaut (comme je n'en doute point) on n'en trouvera jamais a la devotion qui me fera le continuer pour le service de vostre Maiesté, en la qualité, Madame, De son tres-humble, tres-obeißant & tres-fidelle sujét & serviteur. BOESSET

 

 

A la Reyne sur les Airs de Monsieur Boesset

Stances Astre de l'Empire François, Seul sujét des Dieux & des Roys, Reyne, l'honneur du Ciel, & la Gloire des Reynes: Reçevez ces dons precieux, Ce sont des merveilles humaines, Dignes de vos beautés la merveille des Cieux. Ce sont des ouvrages divins, Vainqueur du temps & des destins, Dont le charme à pouvoir sur la Terre, & sur l'Onde, Et qui malgré l'ire du sort, Quand rien ne vivra au monde, Feront vivre BOESSE'T long temps apres sa mort. Les accords en sont ravißants, Et leurs efféts sont si puißants Que tout autre pouvoir dans leur exces s'efface, Et qu'en la Terre, ou dans les Cieux On ne trouve rien qui surpaße Les charmes de ses Airs sinon de vos yeux. Quel esprit ne l'admire pas Quand il fait entendre icy bas En ses divins concerts vos divines loüanges: Les dieux les estiment si doux, Qu'ils voudroyent changer tous les Anges, Et pour eux reçevoir un seul BOESSET de vous. Si BOESSET eust jadis esté En ce siecle ou l'antiquité Montroit de son erreur tant d'infames exemples: On eust veu bien-tost les mortels Bannir Apollon de ses temples, Et mettre au lieu de luy BOESSET sur ses Autels. IMBERT

 

 

Quelle est cette merveille Qui lui d'une si vive ardeur ? Quel Astre fait qu'à sa grandeur Sa beauté soit pareille ? Un regard de ses yeux Fait vivre les mortels, et fait mourir les Dieux. Le Ciel amoureux d'elle, Est à sa voeux si complaisant, Qui luy fait tous les jours present D'une grace nouvelle. Et l'Amour de ses yeux, &c. O ! superbe avanture, O ! sort unique & sans pareil, Qui fait comme un autre Soleil Admirer la nature. Et l'Amour, &c. Quel heur, & quelle gloire, D'aßujettir nos libertés, Où les vertus & les beautés Disputent la victoire: Et par qui les beaux yeux Font vivre les mortels, & font mourir les Dieux.

 

 

Puis que ce Dieu vainqueur, Philis par tes yeux Vient surprendre mon coeur; Pourquoy ne t'ont fait les dieux Plus sensible à l'amitié, Où du moins à la pitié ? Si je devois sentir Ces maux dans tes fers, Tout ainsi qu'un martyr: Pourquoy les ay-je souffers Sans les dire en t'adorant, Et sans espoir en mourant ? Mais je dois esperer Au moins de mon sort L'honneur de l'endurer ? Et croire qu'apres ma mort Tu me nommeras un jour Martyr de gloire & d'amour.

 

 

Recit de Iunon

Ie ne suis plus cette Iunon Pleine de gloire & de renom, Pour vous belle princeße je perds ma royauté. Refrein des Graces L'une de ces déeßes, &c. vous surpaße en majesté, L'autre en beauté. L'une à fait le plus grand des Roys, L'autre le tient deßous ses loys. Pour vous belle princeße je perds ma royauté. Les Graces L'une de ces déeßes, &c.

 

 

Ie sers de l'oeil & du penser La seule deité parmy nous adorable, Et la crainte de l'offenser Accroist ma passion, & la rend plus coupable. O ! que les amants Souffrent de tourments, Quand le respect & la crainte Leur deffend la plainte. Ie croy parmi ces dures loix Mes soupirs innocens du crime qui la touche, I!s sont prisonniers toutes-fois, Et pour leur liberté je n'ose ouvrir la bouche. O ! que les amants, &c. Le feu dans mes veines caché Surpaße les douleurs mesme en leur violence, Et ce pendant pour mon peché Ce supplice est plus doux que celuy du silence. O ! que les amants, &c.

 

 

A la fin cette Bergere Sent les maux que j'ai soufferts, Et sa foy jadis legere Perd ce tiltre sans ses fers: Nous vivons soubs mesme loy Puis que je la tiens à moy. Non, je n'ay plus cette crainte Que j'avois par le paßé: Car Phillis se trouve attainte De ce trait qui m'a bleßé. Nous vivons, &c. Mes feux ont produit sa flame Qui me rend esgal aux dieux, Et l'amour est dans son ame, Qui n'estoit que dans ses yeux. Nous vivons, &c. Mon amour recompensée N'aura plus de desplaisir, Nous n'avons qu'une pensée, Qu'un vouloir, & qu'un desir. Nous vivons, &c.

 

 

Cruel tyran de mes desirs, Respect de qui la violence Au plus fort de mes desplaisirs Me veut imposer le silence: Permets qu'aux Rochers seulement£ Ie conte les ennuis que je souffre en aymant. Ces bois eternellement sourds Ne sont point suspects à ma plainte, Les Ecchos y dorment toujours, I'y suis hors de toute contrainte, C'est là que je puis seulement Desclarer les ennuis que je souffre en aymant. Tout cede au pouvoir de ses yeux, Leur clairté n'ont point de pareille, L'autheur de la Terre & des Cieux N'admire qu'en eux ces merveilles. Außi se beauté seulement Est digne des ennuis que je souffre en aymant. Si la Fortune quelque jour Exauce ma juste requeste, Et fait triumpher ma amour De cette penible conqueste: Alors aux Rochers seulement Ie diray les plaisirs que l'on gouste en aymant.

 

 

Recit

Ne deliberons plus, alons droit à la mort, La tristeße m'appelle à ce dernier effort, Et l'honneur m'y convie, Ie n'ay que trop gemy: Si parmy tant d'ennuis j'ayme encore ma vie, Ie suis mon ennemy. O beaux yeux ! beaux objets de gloire & de grandeur ! Vives sources de flame, ou j'ay pris une ardeur Qui toute autre surmonte A moins que du trespas, Puis-je expier le crime, & reparer la honte D'estre ou nous n'estes pas ? Quelqu'un dira pour moy que je fais mon devoir, Et que les volontés d'un absolu pouvoir Sont de justes contraintes: Mais a quelle autre loy Doit un parfaict amant des respects, & des craintes, Qu'à celle de sa foy. Quand les dieux s'offriroyent a combler mes desirs Des honneurs les plus chers, & des plus doux plaisirs Dont leur richeße abonde, Que sçauroy-je esperer ? Aquoy vostre presence, ô merveille du monde ! Ne soit à preferer ? On parle de l'Enfer, & des maux eternels Qu'ordonne sa rigueur a ces grands criminels Dont les fables sont pleines: Mais ce qu'ils souffrent tous Le souffray-je pas seul en la moindre des peines D'estre esloigné de vous ? I'ay beau par la raison exhorter mon amour De vouloir reserver à l'aise du retour Quelque reste d'allarmes: Miserable qu'il est, Contenter sa douleur, & luy donner des armes C'est tout ce qui luy plaist. Non non, laißons nous vaincre apres tant de combas, Allons faire estonner les ombres de la bas De mon visage blesme, Et sans nous consoler, Mettons fin à des jours que la Parque elle-mesme A pitié de filer. Ie cognois Florimene, & n'ose desirer Qu'un tendre sentiment l'obligeant a pleurer Son repos importune: Mais cela m'arrivant Quelle seroit ma gloire, & pour qu'elle victoire Voudrois-je estre vivant ?

 

 

Air Espagnol
Frescos ayres d'el prado que'a toledo vays que'a toledo vays decid ami dueno como me dexais. Pesares y enojos me quitam el sueno Do llegan pesares Va s'el descanso.
Fraîches brises du Prado, qui allez à Tolède, Dites à mon maître comment vous me laissez. Soucis et chagrins m'enlèvent le sommeil; Là où arrivent les soucis, le repos s'en va.

 

Haut de page

 

traduction: Jacqueline & Alain DUC